無父幹就好難買樓？如果畀得起首期就應該自己買，唔好交租「幫人供樓」？喺網上討論區，不時都會見到類似話題，其實買樓同租樓各有好處，除咗要睇每月供款或者租金價錢，仲要考慮以下幾個因素：

• 買樓：除咗首期同日後每月按揭供款之外，裝修費、維修費、管理費等都係額外支出，對買家嘅財政能力要求相對較高。除咗供款數額或者年期會受市場息率影響，物業價格都會受經濟大環境影響，萬一遇上樓價調整，業主隨時有機會要面對「負資產」嘅情況。所以買樓會比較適合收入穩定、財務狀況較穩健嘅人士，因為佢哋相對會比較能夠應付長期嘅財政壓力。
• 租樓：租金一般已經包埋差餉、管理費等費用，固定家電、維修嘅支出一般都係由業主負擔，所以對租戶嘅財政能力要求相對較低。雖然租金水平同樣會受市場環境影響，但一般嚟講如果經濟大環境轉差，租金相對都會變得平啲。而且租樓相對比較靈活，只要過咗租約規定嘅「死約期」，一般只需要提早一個月通知就可以終止租約，可以有較大嘅彈性，按自己當時嘅生活需要及財政狀况選擇居所，所以租樓會比較適合唔想長期面對供樓壓力，又想靈活配置資金嘅人士。

• 買樓：有人話趁後生買磚頭，退休後都唔使因為住屋開支而頭痕，甚至可以留返層樓畀下一代都仲得；就算唔係用嚟自住，放租出去都可以賺取租金回報，如果物業將來升值，賣出時隨時仲會賺到多一筆收入。如果您視房地產為一項長遠投資，可能買樓會比較適合。
• 租樓：雖然有人話「租樓等如幫人供樓」，每個月都要交租好似好唔抵，但作為租客，除咗唔使一筆過畀首期，呢筆資金又可以靈活配置做唔同類型嘅投資，分分鐘資產增值唔會差過買樓㗎。如果您對唔同類型嘅投資產品有心得，可能租樓會比較適合。

• 買樓：家居間隔、擺設都可以跟據個人或者家庭需要隨時作出改動，因為物業由自己全權擁有，所以比較適合對家居間隔、擺設要求較高，或者預視中長期住屋需求或有所改變嘅人士，例如有計劃生小朋友。
• 租樓：相比之下，作為租客就唔可以對家居間隔、裝修、固定擺設有太高要求，間房、裝修、鑽牆通通唔得，因為主導權喺業主手上，所以比較適合對家居間隔、擺設要求比較簡單嘅人士。