作為投資新手，眼前成大堆數字，佢哋到底有咩意思？同樣係大藍籌，有啲每股幾百蚊，有啲只係幾蚊，真係咁抵買？呢個時候，您就會見到西裝骨骨嘅股評人出動到市盈率 (Price-to-Earning Ratio, PE) 去分析喇。

舉個例，公司股價係100蚊，上年賺10蚊，佢嘅市盈率就係10倍。即係話，買入呢隻股票後，間公司如果年年都賺10蚊，10年後您先返到本。

當股價越嚟越高，公司盈利又冇變嘅話，就代表間公司嘅股價越嚟越貴。相反，股價唔郁，但係公司嘅賺錢能力越戰越強，今年賺20蚊，市盈率就得返5倍，今年嘅股價就比上年平喇。貴定平？用呢條算式，就可以輕易計到！

「港股好平，美股好貴」呢個講法，相信好多人都聽過。除咗逐隻股票睇，市盈率仲可以計埋大市估值貴定平，好似恒生指數咁，集合咗50隻成分股嘅市盈率，通常會同過去10年作比較，好值得參考。不過市盈率係咪越低越好，並唔係單單從數字大細去睇；除咗要睇返該公司過往表現之外，市盈率仲可以與其他屬同一行業嘅股票比較，睇得夠闊先至夠持平㗎。

記住，市盈率係一個相對嘅數字，平唔代表股價有升嘅空間。例如一啲市盈率非常高嘅股票，成百幾二百倍都有人追住搶，點解？多數呢類股票盈利增長都相當可觀，買佢嘅前景都值回票價。相反，一啲市盈率跌到好殘價，前景不明嘅股票，當然無人問津。

最後一提，市盈率並唔係判斷公司潛力同表現嘅唯一指標。市盈率負數嘅股，驟耳聽落去，負數即係公司蝕錢啦，正常人都唔會買落手。不過有啲股票雖然暫時未有錢賺，例如生物科技B股，佢地賣嘅係將來研發嘅技術同產品，炒嘅又係概念、前景再加創意，要評估呢類股份，就要考慮埋貼現現金流(DCF)、管線(Pipelines)估值等， 將會喺往後嘅文章仔細講。

總括來講，投資前真係要做足功課，多啲從唔同角度考慮唔同因素先至入市。而Citi x AAStocks Quick Trade Services就提供咗一個跨平台股票體驗，等您可以睇盡最新消息同股市表現，一click就可以去返Citi Mobile® App即時進行交易，仲可以用手機開戶，既方便又快捷，立即體驗啦！