上回講完市盈率PE，聽落唔難，但係大家可能都聽到有人講市帳率(Price-to-Book Ratio, PB) ，點解有咁多花臣？須知道投資世界千變萬化，深不可測，市帳率PB其實都好值得參考。

簡單啲講，所謂帳面值，就係公司資產值幾多錢。公司多資產，資產值當然就大啲。如果市帳率數值細過1，代表股價低過公司帳面值，為抵買水平；但當市帳率數值大過1，代表股價貴過公司帳面值，為貴水平。例如A公司嘅股價係$15，而每股帳面值係$10，市帳率就係1.5倍，即係話市場願意以1.5倍嘅價格買入公司實際擁有嘅資產淨值理論上，記住係理論上，市帳率數字越低就越平。

提返您先，市盈率PE = 現時股價 / 公司盈利；PE越低，股價越平。唔少專家會用市盈率分析，不過PE其實都有佢嘅限制，往往只可以與同一行業或板塊比較平；而且PE喺計算公司盈利時，往往係基於上一年業積，未必能夠反映企業最新情況 ，例如當公司業務有變動或轉型，呢個計法就未必適合。

另一方面，市帳率PB就較適合特定行業嘅分析，例如銀行股、地產股，皆因佢哋嘅賺錢能力好大程度取決於有幾多資產，好似銀行有幾多存款同貸款，地產有幾多物業土地，直接影響盈利。咁唔好彩，公司經營不善清盤，PB就可反映出公司將資產變賣後套現到幾多資金，對投資者會有參考價值。

當然，PB都有限制。例如多資本多物業，係咪代表真係好好搵？公司好賺錢好掂？其實都要睇市況，好似當銀行水浸，利率又低，唔代表銀行身家雄厚就一定賺好多；又或者地產公司擁有好多物業，但如果市況差，大把貨賣唔出，資金都一樣返唔到家鄉…

相信絕大部分人買股票多數都會考慮公司嘅前景，所以單睇PE或者PB嘅高低，實際上又唔代表一切。而家個個都講輕資產，有啲科技公司未必擁有好多資產，但又真係有唔少人願意大大手畀錢，公司賺緊錢之餘現金流亦唔錯。呢啲行業，就算PE再高，投資者都會笑咪咪受落。相反一啲前景未明嘅傳統行業，PB再低都好，投資者都未必敢話買就買。講到底，PE 同PB都只係衡量企業價值嘅其中兩種指標，投資嘅時候，仲需要考慮市況、行業前景、管理層等其他因素。

投資前做足功課就梗㗎喇，學識多啲估值工具，就可以多角度分析完先入市。而Citi x AAStocks Quick Trade Services就提供咗一個跨平台股票體驗，等您可以睇盡最新消息同股市表現，一click就可以去返Citi Mobile® App即時進行交易，既方便又快捷，而家用手機開戶仲有額外回贈優惠添，唔好錯過啦！