有啲投資者特別偏愛新股市場，尤其踏入第四季，即係傳統新股上市旺季，更加會密密抽。而當個別熱門IPO上市消息出爐時，各大銀行券商都會話預留幾百億孖展額畀人借錢抽新股。究竟投資新股係咪實賺？借孖展抽新股又有咩風險？

一般來講，抽新股嘅入場費係招股定價上限乘以每手股數，再加一眾法定法定收取嘅使費，例如經紀佣金同交易徵費等。另外，代理人即係銀行或者證券商，無論您成功認購與否，亦會向您收服務費。而賣出相關股票嘅時候，亦要畀經紀佣金等雜費，如果無計清楚，隨時賺少一截㗎！

如果隻新股極受歡迎，喺「僧多粥少」嘅情況下，每個散戶能夠抽中嘅機會好低。有啲積極型嘅投資者就選擇會向銀行或券商借孖展趁早入飛，以增加抽中新股嘅機會率。不過，每間券商對新股都設有一個孖展額度，若反應太熱烈，額度就會用盡，屆時散戶借都冇得借，唔好講抽唔抽到。

同埋借孖展就算抽唔中，都係要畀返相關貸款利息。如果中得唔多，就要計埋隻股要升幾多先可以cover利息之餘又有錢賺。萬一抽中新股後股價下跌，更要同時承擔股價嘅虧蝕同利息支出，「蝕息又蝕價」就係咁解。借定唔借，或者應該借幾多，就要自己衡量吓啦！

萬一抽唔到，部分投資者可能會選擇係掛牌首日追貨入市，應唔應該跟機？最簡單就係睇埋市場認購反應：如果新股認購反應熱烈，反映出市場需求亦唔錯，絕對會成為新股掛牌後上升嘅最強動力；若認購反應麻麻地，即係市場都未必睇好，掛牌後嘅表現可能就要觀望吓。

就算新股上市前錄得超額認購，亦唔代表上市後股價一定上升，要知道公司上市前都會「整靚盤數」，最好刨一刨份招股書，留意吓公司業務、財務表現、行業表現、近期發展、風險因素等細節。此外，整體市場氣氛亦會影響新股表現，市旺就自然好。若然上市後股價下跌，投資者又唔肯止蝕離場，分分鐘會成手「蟹貨」。

抽新股同股票投資一樣，都要做足功課先至入手。如果有一個啱您嘅平台，等自己容易上手，往後自然可以事半功倍！好似Citi就豁免咗網上認購新股嘅服務費，幫您減低交易成本。另外，當您喺AASTOCKS Mobile App睇啱價位，一撳就可以即刻跳去Citi Mobile App即時買賣港股，唔駛係咁轉App咁麻煩，夠晒user friendly！