成日聽人講買基金，想試吓投資，但又唔知點開始？正所謂：投資涉及風險，喺入手基金之前，當然要了解基金嘅定義、分類同特性，立即為大家解構！

基金係一種常見嘅投資工具，通常會由股票、債券或其他金融商品嘅投資組合而成，並由專業嘅基金經理所管理。投資者可透過「集資」形式，用較低嘅資金入手心儀嘅投資組合，從而達到投資目標。不同種類嘅基金，其資產分佈、風險程度等都會有所差異。

常見嘅基金分類方式包括：操作模式、投資區域、行業板塊、資產分類、股份及貨幣類別。

基金通常由基金經理以及背後專業投資嘅團隊決定投資目標同策略，因應市場經濟環境調整資產組合配置，從而減低風險、創造回報，呢個方式尤其適合欠缺相關投資經驗及知識嘅新手。另外亦有「指數型基金」，投資目標多數會追蹤特定指數嘅表現，希望同大市走勢「齊上齊落」，受個別股份波動嘅影響程度亦會較低。

基金亦可令投資者更容易投資落其他海外市場嘅資產，打破區域界限，入場門檻相對較低，同時為資金提供更多靈活性。例如著重分散風險，可以考慮投資範圍最廣嘅「全球市場基金」；如果有心水地區，無論偏好已發展市場或者新興市場，揀選覆蓋該地區嘅「區域市場基金」又得；睇好單一國家嘅資產，例如睇好自己用緊嗰部外國電話嘅原產地、追開流行文化嘅國家，選擇投資喺「單一國家市場基金」同樣無問題。

睇好某個行業或者大趨勢，但又唔知道投資邊啲公司？投資基金就可以畀您一次過入手心水行業內嘅不同企業，例如零售、能源、科技公司等熱門分類；又或者可以根據投資主題分類，投資近年好流行嘅健康護理、低碳經濟、ESG 投資等等。透過購買基金，投資者就可以更容易接觸到各種新興嘅投資領域。

基金亦可以根據所投資嘅資產做分類，最簡單可以分爲以下4大類：「貨幣基金」投資各種貨幣市場，多為短線投資，流動性較高，風險相對較低；「債券基金」投資範圍包括不同類別嘅債券，收益穩定，風險屬中低級別；「股票基金」涵蓋各類股票資產，等於同時投資多隻股票，潛在回報和風險相對較高。想喺「債券基金」同「股票基金」之間攞個平衡點，可以考慮同時包含股票及債券等不同資產嘅「平衡基金」，分散投資風險，回報及風險屬於中等級別。

基金亦可以按照基金係咪派息，分爲「派息」(Distribution) 或者「累積」(Accumulation) 。「派息」指基金公司會將收益以派息形式畀返投資者，啱曬啲目標有長期收入嘅人；而派息頻率又可分為：月配息、季配息、半年配、年配等級別。而「累積」則指基金公司將收益累積喺基金中，幫您繼續投資。除此之外，基金亦可以選擇以不同貨幣作爲投資，除咗用港幣同美元買賣，其他外幣都一樣可以用嚟投資。如果您有多餘外幣，又未有得出發去旅行，唔知道點用，都可以用嚟投資基金，分散貨幣風險之餘仲多個機會幫財富增值！

喺選擇基金時，記得要先做好research，了解相關投資內容、過往表現、預期回報、風險程度、收費等，再考慮個人投資目標、預算資金及承受風險能力先至入手。您可以透過Citi Mobile® App用HK$1或者US$1 買到個別嘅基金，用HK$100買基金組合亦得，畀您隨時隨地輕鬆投資！您仲可以喺app 入面嘅「基金搜尋器」，根據基金名稱、地區、行業、種類、貨幣、基金公司等搵出您嘅心水基金，想點買全程由您話事！