前排老牌攝影器材企業柯達被力捧做藥股，貸款研發做非專利藥品原料，消息一出柯達股價即刻於兩日內飆升近10倍，觸發超過10次熔斷，搞到投資者想追貨都要等等先。其實早喺今年3月，美市亦曾經一度因為疫情而跳水，觸發過熔斷機制，搞到要成個市暫停買賣一陣。呢兩次事件對一眾投資者來講可能會覺得好震撼，究竟有咩大事發生先可以叫停個市？

美國喺1987年股災後引入熔斷機制（Circuit Breaker），於全球各主要股票市場，為咗防止市場過度波動而推出相應限制，目的係畀投資者有時間冷靜情緒。當市場突然波動過大，就會自動觸發熔斷機制，好似平日啲電器自動「跳Fuse」咁。呢個時候，市場會暫時停止交易買賣或者休市，等經過一段時間後再恢復返。

對於大市嘅熔斷機制，喺以標普 500指數嚟做基準，可以分做三個階段：

• 階段一：當標普 500指數較上日收市價跌7%，暫停15分鐘，畀大家先休息冷靜下；
• 階段二：恢復交易後再跌，如累跌13%，再停賽15分鐘，再畀各位過多次冷河；
• 階段三：恢復交易後如果繼續跌，當跌幅達到20%後就會直接完場，全日停市。 

留意返，階段一同階段二只適用係開市到收市前35分鐘，如果收市前35分鐘個市急跌，只要跌幅唔多過20%，係可以任跌唔嬲；但當跌幅去到成20%，都係會即時休市，交易所直接關門收工。

一般嚟講，喺熔斷之後股市會恢復流動性，唔代表會升或會跌。而喺充足嘅流動性之下，某程度上亦有利於穩定市場情緒，令相關指數或股份更容易反映實際價值，平衡小散戶同大莊家嘅力量。最後提提大家，股票市場風高浪急，就算係趕住入市或者趕住出貨，都要留意呢啲限制，尤其愛玩細價股嘅投資人士，以免要承受自己持有嘅股票有被暫停交易嘅風險。