稅季來襲，打工仔收到「綠色炸彈」都相當頭痕，市面上亦出現咗唔同嘅稅貸產品，幫助大家應付交稅或者其他理財需要。到底稅季貸款同一般私人貸款有咩分別？申請稅貸前有咩要注意？如果想借稅貸做定期存款又有無得諗？即刻為大家解構！

一般私人貸款，係指以個人名義向金融機構申請借貸，亦無需以個人資產作抵押；銀行或者財務機構會因應申請人嘅需要同信貸紀錄，去釐定利率、借貸金額以及還款期，一般情況下全年都會接受申請。

而稅季貸款其實係私人貸款嘅一種，顧名思義就係幫助打工仔交稅，銀行或財務機構亦會喺稅季期間（通常為每年9月至翌年4月）推出稅季貸款優惠。為咗吸引客戶，部份稅貸產品嘅利息可能會比其他一般私人貸款計劃低，不過最終利息亦會受貸款額、還款期及申請人嘅信貸評級影響。

稅貸雖然名義上係用作交稅，但其實用途並無特定限制，所以部分人士會趁住稅貸優惠，而選擇申請稅貸用作資金周轉、創業、分期消費等用途。不過申請稅貸時，都需要留意以下幾點：

想知道借錢嘅實際支出，首先要學識睇實際年利率(APR) 。實際年利率除咗原有嘅貸款利息外，亦已經將回贈、手續費、行政費等其他收費計算在內。所以大家可以用實際年利率去比較不同嘅貸款產品嘅借貸成本，同時亦要留意推廣優惠有無其他要求，例如最低貸款額、特定還款期、提早還款嘅額外手續費等，再選擇適合自己嘅貸款產品或計劃。

申請貸款前，最好先計算每月嘅收入、支出、儲蓄等，再評估自己嘅還款能力，避免過分借貸。雖然選擇較長嘅還款期可以減短期嘅財政壓力，但實際利息支出亦會相應增加，所以記得要小心計算清楚自己嘅還款同承擔風險嘅能力，最重要係記得要準時還款，以免負擔額外嘅財務費用，以及影響個人信貸紀錄。

部分稅務貸款嘅實際年利率偏低，所以部分人士會考慮利用稅貸款項作定期存款、從中賺取息差。不過將貸款定存其實會鎖定資金，變相有機會每月要動用額外現金去償還款項；若然市況不似預期，更有機會倒蝕本金兼要畀利息，以致得不償失。所以記得要預留應急資金，確保還款及日常生活不受影響。