香港係一個經濟獨立嘅城市，屬於外向型開放性經濟體，經濟活動自由度好高，不嬲都被評為世界上最自由嘅經濟體。但一連串當前發生嘅政經局面，令到以往好少人擔心嘅聯繫匯率制度，突然成為全城甚至全球嘅經濟焦點，如果您自問對佢唔算太熟識，係時候一齊補補課！

唔講得笑，呢個匯率制度已經好有經驗，係香港金融管理局首要貨幣政策之一，帶嚟好多正面影響，一直持續到今時今日。佢喺1983年成立，喺制度管理框架之下，金管局維持一美元兌7.75港元至7.85港元嘅區間，保持港元幣值嘅穩定性。另外，三間發鈔銀行包括中國銀行、匯豐銀行，同埋渣打銀行，按7.8港元兌1美元嘅匯率，以美元向金管局嘅香港外匯基金購買負債證明書，又或者以同樣嘅匯率，賣出等值嘅美元 。即係話，三間銀行要增加或者減少貨幣供應，都要透過負債證明書，以等值美金作為支持，達到百分百外匯儲備保證。

能夠維持聯繫匯率制度，對香港來講係重要嘅。因為當香港能夠受惠於美國大致穩定嘅貨幣環境，同埋高度公信力嘅貨幣政策，就可以減少國際貿易中嘅外匯風險，有利不同類別嘅長期貿易、合同，同埋國際資本嘅積聚，帶畀香港更多利益同機會。

至於升斗市民同埋一般投資者最關心嘅，就梗係美國會唔會向聯繫匯率制度出手，甚至令港幣同美金脫鈎！理論上，美方係有能力透過禁止美國同埋其他國家嘅銀行，向香港、甚至整個中國嘅銀行出售美元，當所有美金流出咗香港外匯儲備，聯繫匯率制度長遠來講就冇辦法行得通。不過此舉將會同時動搖市場對美元，甚至美國經濟嘅信心。大選當前，市場覺得特朗普咁樣做實在冇乜着數。