面對市場波動，有投資者會選擇趁低吸納，以為只係「技術性調整」所以乘機掃平貨；點知原來個市「低處未算低」，隨時搞到一齊跌入熊市。除咗熄app唔睇同上討論區圍爐，有無諗過轉陣，考慮採取另一種相對穩陣嘅投資策略呢？債券就係其中一種值得留意嘅較低風險投資。

債券大致可以分為國債同企業債券，國債當中以美國國債算係最多人留意， 簡單嚟講就係借錢俾美國政府同借俾企業嘅分別。運作大致係如果您肯借錢比美國政府 （即係買美國債券），美國政府就會連本帶利到期找數。而其他要問人借錢嘅企業，佢哋嘅債息會比美債息呢個無風險指標利率上加多啲，作為承擔風險嘅補償。

疫情時為咗刺激經濟，環球大放水嘅政策令錢變得「無價值」，美債息率低到接近零；買100萬美債，到期就只係拎返100萬。隨住疫後經濟逐步恢復，消費需求大幅增加，但供應就依然受制於物流、生產效率唔夠快等唔同嘅因素，喺供不應求嘅情況下，物價自然飛升。

為咗抑制通脹，美國政府決定加息，令美債息同其他企業嘅債息一齊上升。截至2022年7月14日，單睇兩年期美國債息已經高見3.4%以上，即係買100萬美債，一年息就三萬四，揸到期兩年總共收返106.8萬元。相比之前嘅零息時代，呢筆利息收入實在非常可觀。

當然，美國依家仲加緊息，債息有可能會繼續升。喺呢個時候您可能會問：「遲啲買，啲息高啲，而家買咪會蝕？」債券最大嘅好處，就係揸到期，如果個國家或者企業無財務問題，無破產，投資者按道理可以收返本金同持有期間應得嘅利息，中間價格升跌最終都係無咩影響。重點係「揸到期」！反正遲買又唔知係咪真係會平啲，不如早買早享受仲好啦。何況市場而家又開始講緊經濟衰退嘅故仔，遲啲可能又會講到聯儲局轉軚減息，到時債息落返嚟就可能錯失良機㗎啦！

不過要記住，債券始終都係投資嘅一種，萬一債券發行人破產或者唔肯還錢，就會出現所謂嘅違約風險，有機會損失本金，所以發行人嘅信用評級都相當重要。入手任何投資產品前，都要做足功課，小心選擇適合自己嘅投資產品。