米線舖上市，您知道佢係餐飲新股；電動車公司上市，您知道佢係汽車新股；視頻社交平台上市，您知道佢係科網新股，但係原來有啲公司未知道係咩生意，都可以上市？

如果有人同您講：「不如畀啲錢我搞生意？」您可能會即刻問：「搞咩生意先？」「未定㗎，您俾咗錢先，到時我自然會搵啲嘢做。」講到呢度，您會點諗呢？如果問嗰個人名不經傳，您未必會show佢，仲會即刻掉頭走；但如果佢係享負盛名，做生意或者投資都有好多成功往績嘅企業家、基金經理，您或者可能會心郁郁？SPAC就係類似嘅概念。

SPAC 全名係Special Purpose Acquisition Company，即係「特殊目的收購公司」，又被稱為「空白支票公司」── 皆因投資者喺畀錢投資嘅時候仲未知抬頭會寫咩公司，係一種私人企業「借殼上市」嘅渠道。SPAC嚴格來講係一個「殼」，本身並無營運業務，目的係透過IPO募集資金後，再去收購有前景但未上市嘅公司，等同被併購嘅公司能夠借殼上市。

值得留意嘅係，SPAC 必須要喺一定期限內搵到併購目標，並完成併購。喺美國，SPAC由 IPO 結束到完成併購，即de-SPAC過程，通常係需要喺 24 個月內完成，否則SPAC 就會被解散，然後要將信託資產連同利息歸還俾股東。

截至2021年4月底，一年內美國有超過500間SPAC申請上市，集資超過1,500億美元。香港早前亦公布引入SPAC上市制度諮詢文件，為創新公司提供多一個上市渠道，投資者又多一個新股選擇。究竟散戶投資SPAC有咩好處同風險？最後尾又會唔會由「無抬頭支票」變咗做「空頭支票」？我哋下篇再講。