上篇講到，SPAC喺上市之後先會再揀做咩公司，咁股價又係點？可能神秘有神秘嘅好處，反而大家估吓估吓又會引起唔少憧憬，市場亦似乎將SPAC當成增長股咁炒，連走勢都類似。

早前喺增長型股份投資氣氛非常高漲嗰時，大家唔難見到，就算間SPAC未宣布會收購啲咩生意，股價都已經偷步升到遠高於間公司揸住嘅現金價值。不過連會收購啲咩，甚至會唔會收購都未知，個價已經升到咁，之後又點樣持續？尤其當憧憬變成現實之後。有學術研究顯示，自2010年以來，落實咗併購嘅SPAC，即係de-SPAC，每年平均都跑輸羅素2000指數。睇埋2020年嘅例子，好多仲要有一定數目嘅高質企業家或者基金經理加埋入個SPAC party，但跑輸走勢仍然持續，由2020年10月計起，de-SPAC累積錄得負回報，同期嘅羅素2000指數唔止有得升，正回報更加高達52%。

其實大部分SPAC睇中收購嘅公司，都係圍繞備受市場觸目嘅大趨勢，例如科技軟件、健康護理同生物科技、電動車、清潔能源同金融科技。但係部分同SPAC合併嘅公司，業務成熟程度遠低於用傳統IPO上市嘅新股。好似2021年第一季SPAC熱爆時，當時美國25大de-SPAC中有四成連收入都未有，無營業額往績，但係平均市值都超過60億美元。雖然SPAC一方面提供憧憬同故事，但另一方面就存在唔少投資風險，仲引起咗監管機構嘅關注，好似美國證交會就已經收緊對SPAC嘅監管。究竟SPAC係「一登龍門，升價十倍」定係「一朝得志，語無倫次」？大家投資前要小心考慮清楚喇！