近年大家都越嚟越注重環保，衣食住行都要Go Green，Sustainable變成Fashionable！想食Green啲？而家市場上有人造肉或者植物肉，畀消費者「肉類替代品」嘅選擇。呢啲產品力求外觀、味道同質地可以拍得住真肉，宣稱對身體同環境都更好。

選擇替代肉類嘅消費者，通常出於個人健康考慮，因為對比傳統牛肉漢堡，人造肉漢堡熱量同膽固醇都低啲。隨住替代蛋白質公司改進肉類替代品嘅味道、價格同營養狀況，市場預計會有更多消費者轉向替代肉類。有替代肉公司誓言喺未來 2-3 年內，產品可以發展到同傳統肉類嘅價格差唔多。

另一方面，部分消費者仍然未太了解素食習慣對環境嘅好處。雖然好多素食人士嘅初衷只係保護動物，但專家已經證實，牲畜養殖係甲烷氣體最大來源之一，而甲烷引發嘅溫室效應比二氧化碳仲高，控制畜牧排放對減緩氣候升溫有好大幫助。換句話講，從環保及可持續發展角度出發，消費者有更多理由去購買替代肉類。

肉類替代品市場充滿潛力，增長越來越快，睇返以上圖表， 2020年整體銷售額增長達到45%，升幅較傳統肉類銷售額多一倍。現時傳統肉類行業價值約 1.2 萬億美元，即係超過9萬億港元，係最有可能受到替代肉類增長影響嘅行業；而部分全球傳統肉類加工商，都開始投資替代/植物性肉類，實現業務組合多元化。大家喺選擇投資板塊嘅時候，不妨留意呢股Gold Green新勢力。