面對疫情反覆不定，除咗減少社交接觸，大家都比以前更注重健康。另一方面，本地醫療需求殷切，醫療成本又不斷上升，因此近年多咗人選擇購買醫療保險，希望為自己同屋企人加添多一份保障外，同時可減輕高昂醫療費用帶來嘅經濟負擔。講到醫療保險，坊間都有好多選擇，究竟有咩分別？簡單嚟講，常見醫保可分為以下三大類別：

門診保險係指公立或私家醫院及私家診所嘅一般或專科門診保障，大多不設核保，投保相對容易；不過就未必保證終身續保，如投保較低級別計劃，有可能需要承擔一部分門診費用（即自付費用），每年亦有索償上限。而部分計劃有機會只覆蓋指定醫療網絡內嘅醫生，或者不包括特別處方特效及昂貴嘅藥物，所以變相可能會限制咗受保人嘅選擇。

住院保險係指住院期間嘅實報實銷醫療開支保障，部分亦有提供每日住院現金幫你應付生活開支，短期內唔使擔心手停口停。不過要注意嘅係，一般情況下，手術費之類嘅專科治療支出只賠償若干百分比，住院現金亦有賠償日數上限。

危疾保險係指被診斷患上保單內任何列明狀況或嚴重疾病嘅賠償，通常會以一筆過賠償形式發放，解決客戶嘅燃眉之急。不過呢類保險通常有投保年齡上限，投保人亦須要注意保單對各類危疾嘅定義及賠償次數嘅限制。

以上三種醫保嘅保障範圍各有不同，更可以互補。想喺可負擔範圍內得到充足嘅醫療保障，購買醫保前一定要根據自身需要和負擔能力考慮保額、保障範圍、保費、條款等因素，不妨搵多幾款醫保產品比較，然後按照自己、家庭及健康狀況自製醫保組合。

公司醫療保險則係由企業提供畀員工嘅福利，而且保障範圍係要視乎僱主嘅投保選擇而定。某程度上，公司提供嘅醫療保險，只能夠有限度保障打工仔嘅醫療需要，例如畀僱員用一個較相宜嘅價錢去睇網絡醫生，或者承擔一部分醫療費用；不過萬一僱員患上嚴重疾病、甚至需要做手術，公司所提供嘅團體醫療保險就未必能完全覆蓋醫療費用。

為市民提供多一個選擇，自願醫保計劃係政府推出嘅一項政策措施，以規範保險公司嘅個人償款住院保險產品。喺自願醫保計劃下，參與嘅保險公司提供經認可嘅個人償款住院保險產品，讓消費者自願購買。有別於一般醫保，自願醫保係保證續保至100歲，就算個人健康狀況有變都冇問題。部分計劃更不設終生保障限額，投保時未知嘅已有病症一樣受保，更涵蓋日間手術費，保障比較全面。此外，自願醫保更享有扣稅優惠，令投保人有機會節省稅務支出^*。

^*有關稅務扣減詳情，請參閱香港稅務局網頁。您亦可向您的稅務及會計顧問徵詢稅務意見。友邦香港及中介人並不提供任何稅務或會計建議。