有人話保險應該趁後生買，越早準備好，就越快可以「坐享其成」。不過亦有唔少職場新鮮人表示人工有限，又或者本住「遲啲先」嘅心態，認為保險唔使急住買，但事實係咪真係咁？即刻同大家拆解常見嘅保險迷思！

單靠儲蓄，係咪真係足夠應付突如其來嘅需要？皆因對於啱啱踏入社會工作嘅年輕人嚟講，儲錢嘅速度可能相當有限；而Touch Wood有咩突發事，亦都難以係短時間內籌備到大筆資金去應對。所以有人提倡年輕人可以用「先保障後理財」呢個概念去規劃人生，起步時可以考慮用收入嘅1/10嚟買保險，萬一有咩意外，都有保險做後盾，幫手「轉嫁」風險，咁就唔使怕有事發生時會手忙腳亂啦！

無論喺邊一個人生階段，都需要不同種類嘅保障，而唔少保險計劃喺計算保費時，都會參考投保人嘅年齡，一般嚟講越年輕收費越低，換句話講即係「早買早享受」，為未來做好準備。至於選擇邊類型嘅計劃，就要考慮個人嘅需要同財政狀況，例如預算有限嘅朋友可以先由住院現金保障入手，財政較充裕嘅就可以考慮投保醫療、危疾保險；如果父母年紀較大，或者已經係退休人士，作為家庭經濟支柱嘅您就可能需要為自己買一份人壽保險，以保障屋企人。